सम्बन्धित ऐन तथा नियमावलीमा भएका अन्य व्यवस्थाका अतिरिक्त यस कार्यालयका काम, कर्तव्य र अधिकारहरू देहायबमोजिम रहेका छन्:

• महालेखा नियन्त्रक कार्यालयको प्रतिनिधिको रूपमा जिल्लास्थित कार्यालयहरूको आर्थिक कारोबारको रेखदेख, निरीक्षण तथा अनुगमन गर्ने र महालेखा नियन्त्रक कार्यालयको नीति, निर्देशन तथा प्रचलित कानूनको अधीनमा रही आवश्यक राय, सल्लाह तथा सहजीकरण प्रदान गर्ने,
• आफ्नो कार्यक्षेत्रभित्र आर्थिक कारोबार गर्ने कार्यालयहरूको लगत तयार गरी महालेखा नियन्त्रक कार्यालयको परामर्शमा कार्यालय सङ्केत नम्बर प्रदान गर्ने तथा उक्त लगत अद्यावधिक रूपमा कायम राख्ने,
• कार्यालयहरूबाट विनियोजन, राजस्व तथा धरौटी रकमको आम्दानी र खर्चसम्बन्धी विवरण संकलन गरी समेकित विवरण तयार गर्ने र महालेखा नियन्त्रक कार्यालयमा पठाउने,
• महालेखा नियन्त्रक कार्यालयले तोकिदिएको, प्रचलित कानून वा नेपाल सरकारको निर्णय बमोजिम कोष तथा लेखा नियन्त्रक कार्यालयबाट आन्तरिक लेखापरीक्षण गराउनुपर्ने केन्द्रीय निकाय तथा कार्यालयहरूको राजस्व, विनियोजन, धरौटी, जिन्सी तथा प्रचलित कानूनअनुसार स्थापना गरिएको कार्यसञ्चालन कोषको आन्तरिक लेखापरीक्षण गराउने,
• कार्यालयलाई दिइएको अख्तियारी तथा बजेट बाँडफाँट बमोजिम निकासा गर्नुपर्ने रकमको कार्यालयगत तथा गोश्वारा लेखा राख्ने, निकासा दिने तथा निकासा गरिएको रकमको विवरण बैंकबाट प्रमाणित गराई महालेखा नियन्त्रक कार्यालयमा पठाउने,
• सरकारी कार्यालयका लागि विनियोजित बजेट सम्बन्धित कार्यालयबाट प्राप्त भुक्तानी आदेशअनुसार भुक्तानी निकासा गर्ने तथा एकल खाता कोष सञ्चालन कार्यविधिबमोजिम लेखा राख्ने,
• राजस्व तथा धरौटी लेखासम्बन्धी विषयमा आवश्यकता अनुसार कार्यालयहरूको निरीक्षण गरी सोको प्रतिवेदन महालेखा नियन्त्रक कार्यालय तथा सम्बन्धित कार्यालयको तालुक केन्द्रीय निकायमा पठाउने र प्राप्त निर्देशनबमोजिम कार्य गर्ने,
• विनियोजन लेखा, नगद मौज्दात तथा बेरुजु फस्यौटसम्बन्धी विषयमा कार्यालयहरूको निरीक्षण गरी सोको प्रतिवेदन महालेखा नियन्त्रक कार्यालय तथा सम्बन्धित कार्यालयको तालुक केन्द्रीय निकायमा पठाउने र महालेखा नियन्त्रक कार्यालयबाट प्राप्त निर्देशन बमोजिम कार्य गर्ने,
• निरीक्षणको क्रममा स्रेस्ता दुरुस्त नरहेको, हिनामिना भएको, पेश गर्नुपर्ने प्रतिवेदन नियमित रूपमा पेश नगरिएको वा यस नियमावली बमोजिम गर्नुपर्ने अन्य कार्य नगरेको पाइएमा कार्यालयको भुक्तानी निकासा, खाता तथा आर्थिक कारोबार रोक्का गरी सम्बन्धित तालुक केन्द्रीय निकायलाई जानकारी गराउने,
• महालेखा नियन्त्रक कार्यालयको प्रतिनिधिको रूपमा प्रदेश तथा स्थानीय संचित कोषको सञ्चालन, लेखाङ्कन, प्रतिवेदन तथा खाता सञ्चालनसम्बन्धी विषयमा आवश्यक समन्वय, सहजीकरण तथा परामर्श प्रदान गर्ने,
• महालेखा नियन्त्रक कार्यालयले समय-समयमा तोकिदिएका अन्य कार्यहरू गर्ने।